बा–आमा अध्यक्ष श्रीमती प्रमुख अतिथि

२७ बैशाख, सुर्खेत– वीरेन्द्रनगर नगरपालिकाका नगर प्रमुख (मेयर) पदका स्वतन्त्र उम्मेदवार गेहेन्द्र प्रसाद दाहालले बुधबार वीरेन्द्रनगरमा चुनावी सभा गरेका छन् । उक्त सभाको अध्यक्षता बुबा कृष्णप्रसाद दाहाल र आमा विष्णुकुमारी दाहालले गरेका थिए भने प्रमुख अतिथिमा धर्मपत्नी भुमिसरा दाहाल रहेकी थिइन् ।

शिक्षा क्षेत्रबाट राजनीतिमा प्रवेश गरेका दाहाललाई वीरेन्द्रनगरमा सशक्त उमेदवारको रुपमा हेरिएको छ । उक्त सभामा विभिन्न समूदायका प्रतिनिधिहरुलाई विशिष्ट अतिथि बनाईएको थियो । कलाकार नन्दा बस्याल, भुमि अधिकार मञ्चका अध्यक्ष पहलसिं पहराई मगर, चौधरी समूदायका गौरी चौधरी र यगलाल चौधरी, दलित समूदायबाट टोपबहादुर नेपाली लगाएत अतिथि रहेका थिए ।

दाहालले कुर्चीमा बसेर झण्डा हल्लाएर मात्र देशको विकास नहुने बताएका छन् । ‘देशमा नेता त धेरै छन् तर नेतृत्व गर्न सक्ने क्षमता भएका कम छन् । मेरो उमेदवारी काम गर्नका लागि हो’, उनले भने । जनताका समस्यालाई समाधान नगर्ने नेतालाई भोट माग्ने हक पनि नभएको उनले बताए ।