१४ जेठ । कर्णाली प्रदेश सरकारले कोरोना संक्रमणको नियन्त्रणको लागी नेपाली सेना परिचालनका लागि संघ सरकारसँग स्वीकृति मागेको छ । कोरोना महामारीबाट प्रभावित र संक्रमित नागरिकको उद्वार र क्वारेन्टाइन व्यवस्थापनका लागि नेपाली सेना परिचालनका लागि सरकारसँग अनुरोध गर्ने निर्णय गरिएको सरकारका प्रवक्ता एवम् भूमि व्यवस्था, कृषि तथा सहकारी मन्त्री विमला केसीले जानकारी दिनुभयो ।
जेठ १२ गते सोमबार बसेको मन्त्रिपरिषद् बैठकले कर्णालीमा एकाएक कोरोना संक्रमणको दर बढेको सन्दर्भमा नेपाली सेना समेत परिचालन गर्नुपर्ने अवस्था आएको मन्त्री के.सीको भनाई छ ।
यस्ता छन् मन्त्रिपरिषद्का निर्णयहरु :
१ कर्णाली प्रदेश भित्र संवत् २०७७ सालमा निम्न दिनहरुमा सार्वजनिक विदा दिने र सो को सूचना राजपत्रमा प्रकाशन गर्ने ।
२ पूर्वाधार विशेष कार्यक्रम कार्यान्वयनका लागि कर्णाली प्रदेश विनियोजन ऐ, २०७६ दफा ९ बमोजिम बजेट कार्यान्वयन सहजताको लागि आदेश जारी गर्ने।
३ कर्णाली प्रदेश विनियोजन विधेयक, २०७७ का सिद्धान्त, उदेश्य, प्राथमिकता र प्रमुख नीतिहरु प्रदेश सभामा पेश गर्न स्वीकृति प्रदान गर्ने।
४ कर्णाली प्रदेशमा व्यापार-व्यवसायको दर्ता तथा सञ्चालन सम्बन्धमा व्यवस्था गर्न बनेको विधेयक प्रदेश सभामा पेश गर्न स्वीकृति प्रदान गर्ने।
५ प्रदेश औद्योगिक व्यवसाय सम्बन्धमा व्यवस्था गर्न बनेको विधेयक प्रदेश सभामा पेश गर्न स्वीकृति प्रदान गर्ने।
६ विश्वव्यापी महामारीको रुपमा फैलिरहेको कोभिड-१९ को कारणबाट रोजगारी गुमाएका र महामारीबाट त्रसित भइ भारतबाट ठूलो संख्यामा नेपाली नागरिकहरु स्वदेश फर्किने क्रम जारी रहेको र यसबाट प्रदेशमा महामारी झन् फैलिन थालेको तथा नेपाल प्रहरी र सशस्त्र प्रहरी बल सुरक्षासम्बन्धी अन्य कार्यहरुमा समेत खटिनु पर्ने हुँदा महामारीबाट प्रभावित र संक्रमित नागरिकको उद्धार तथा क्वारेण्टाइन व्यवस्थापनमा समस्या हुने देखिएकोले यस कार्यका लागि नेपाली सेना समेत परिचालन गर्नुपर्ने स्थितिमा सोको स्वीकृतिका लागि नेपाल सरकारसँग अनुरोध गर्ने।
Online Media Reg. No.: 70/073-74
प्रतिकृया दिनुहोस्